ინგლისი, 1852 წელი... ამერიკის შეერთებული შტატები, 2007 წელი... ჩინეთი, 2098 წელი... ტექსტი ერთდროულად გვიამბობს სხვადასხვა ისტორიულ პერიოდში მცხოვრებ ოჯახებზე, სამ ქვეყანასა და სამ სხვადასხვა რეალობაზე, რომელთა დამაკავშირებელი მედიუმი - ფუტკრებია. წიგნი შესანიშნავად ასახავს არა მარტო ადამიანებისა და ბუნების გაუცხოებას, არამედ ოჯახური ურთიერთობების კომპლექსურობას, რომლის ძირითადი ხაზიც მშობლებსა და შვილებზე , მათ პრობლემებზე გადის. მიუხედავად იმისა, რომ წიგნი ფუტკრების ამბავს გვიყვება , არ უნდა ვიფიქროთ , რომ ამ ორიგინალურ რომანში მთავარი მხოლოდ ფუტკრებია... სკაში, ფუტკრების ოჯახების ქცევაზე დაკვირვების პარალელურად, თვალს ვადევნებთ სახლებში ადამიანთა ოჯახების ემოციურ, ხშირად დამთრგუნველ ყოველდღიურობას, ისე რომ, საბოლოოდ, ვაცნობიერებთ, რამდენი საერთო შეიძლება გვქონდეს ფუტკრებთან და როგორ არ გვესმის არა მხოლოდ სხვა არსებების, არამედ ჩვენი მსგავსი ადამიანების, მათ შორის კი საკუთარი ოჯახის წევრების.
ლიტერატურული ღირებულების გარდა , ტექსტი ერთგვარი შეტყობინებაა, რომელიც გვახსენებს, უფრო კი გვაფრთხილებს იმ შესაძლო რეალობაზე, რომელშიც აღმოვჩნდებით, თუკი დედამიწაზე მავნე ზემოქმედებას არ შევწყვეტთ.
როგორც ავტორი აღნიშნავს, მას სურს, რომ შექმნას ერთმანეთთან დაკავშირებული, თუმცა დამოუკიდებელი რომანები, რომლებიც შეეხება კლიმატთან დაკავშირებულ ოთხ სპეციფიკურ თემას : მწერებს, წყალს,ცხოველებს და საბოლოოდ ყველაფერს, რაც იზრდება.
"ფუტკრების ამბავი" მაინც ადამიანთა უჩვეულო თავგადასავალია, მათი წარსული, აწმყო და შესაძლოა მომავალიც, რომელსაც ლაიტმოტივად ფუტკრების ბზუილი გასდევს...
