გრძელდება ჩემი და მურაკამის მეგობრობა...მისი მორიგი წიგნი , რომელმაც ასევე გარკვეული შთაბეჭდილება მოახდინა არის "ნადირობა ცხვარზე". თხრობის სტილი აქაც მშვიდია, სიუჟეტი მარტივი,თითქოს განსაკუთრებული არაფერი, პერსონაჟები აქაც მუსიკის, კითხვის და სასმელის მოყვარული ახალგაზრდები არიან. მეგობრობა, სიყვარული და ერთმანეთისთვის დახმარების ხელის გაწვდენა აქაც მძაფრად იგრძნობა, მაგრამ .... მურაკამის შემთხვევაში ყოველთვის არსებობს სიტყვა - "მაგრამ". უცბად ყველაფერი ირევა, სიმშვიდე სადღაც ქრება, ყველაფერი ყოველგვარი ახსნა-განმარტების გარეშე სრულდება და ჩნდება უამრავზე უამრავი კითხვა, რომლებიდანაც უმეტესობა ასე პასუხგაუცემელი რჩება.
წიგნის მთავარი პერსონაჟი , რომელსაც სახელი არ აქვს, ახალგაზრდა იაპონელია, რომელიც განსაკუთრებული თვისებებით არ ხასიათდება, ცოლს გაშორებულია, ცხოვრობს ბებერ კატასთან ერთად , უყვარდება იდეალური ყურების მქონე ქალი, პატარა სარეკლამო ფირმის მეწილეა და თავის მეწყვილესთან ერთად სხვადასხვა პროდუქციის რეკლამებს იგონებს.
ერთ დღეს, ეს ყველაფერი, უცნაური კაცის გამოჩენის შემდეგ ,ძირფესვიანად იცვლება. უცნაური კაცი მას ცხვრის პოვნას ავალებს, რომელიც დედამიწაზე არსებულ დანარჩენ ცხვრებს არ ჰგავს. უმთავრესი განმასხვავებელი ნიშანუ კი მის ზურგზე არსებული ვარსკვლავია. მთავარი კი ის არის ,რომ ამ ცხვარს ადამიანებში ჩასახლება და შემდეგ მისი "გამოცხვარებულად" დატოვება შეუძლია. თუ ის მას იპოვის, უცნაური კაცი მას ყველანაირ სურვილს შეუსრულებს, თუ არა და მაშინ მთავარი გმირის ადგილი ქვეყნიერებაზე აღარ იქნება.
ამიტომ , მთავარი გმირი თავის იდეალურყურებიან შეყვარებულთან ერთად, იარაღის მაგივრად - გამოცანებით აღჭურვილი, ჰოკაიდოზე, ცხვრის მოსაძებნად მიემგზავრება. მოგზაურობა დამღლელია, თუმცა ძალიან საინტერესო. უამრავ საიდუმლოს ეხდება ფარდა, თუმცა ამავდროულად უამრავი კითხვა იბადება. კითხულობ , კითხულობ და ადამიანში ცხვრის ჩასახლება ან ჯადოსნურყურებიანი გოგო რაღაც სისულელე გგონია, მაგრამ ის შეგრძნება, რომ ამ ყველაფრის უკან სულ სხვა რაღაც იმალება, ერთი წამით არ გტოვებს.
წიგნის სიუჟეტი ძველ იაპონურ მითს ეფუძნება, რომლის მიხედვითაც ვერძი , ბუდაზე ადრე არსებობდა და ის ადამიანებში სახლდებოდა, განუსაზღვრელი თვისებებით ასაჩუქრებდა. სამაგიეროდ კი, სხვადასხვა საქციელებისკენ უბიძგებდა, რომ საბოლოოდ მიზნისთვის მიეღწია და ქვეყანაზე ანარქია მოეწყო...
საბოლოო ჯამში ძალიან კარგი წასაკითხი წიგნია, საინტერესო სიუჟეტით და უამრავი გასახსნელი კვანძით, ასევე უამრავი ფსიქოლოგიური მომენტით. დარწმუნებით ვერ ვითყვი , რომ ყველა კვანძი გავხსენი, მაგრამ ალბათ, ამ წიგნის მთავარი თვისება სწორედ ესაა - დაგიტოვოს ბევრი გამოცანა, რომელზეც კიდევ მრავალი დღე იფიქრებ.
ერთ-ერთი დასკვნა კი ისაა, რომ ჩვენში, ყველაში ცხოვრობს ცხვარი, რომელსაც არ უნდა შევუშინდეთ, არ უნდა დავემორჩილოთ და ბატონობის უფლება არ მივცეთ. როგორც ჰარუკი მურაკამი ამბობს : "ყველაფერი ხომ რაკურსზეა დამოკიდებული , იმაზე თუ რა კუთხით შეხედავ".
- იმას რაც ყველაზე ძალიან გაწუხებს, ვერასოდეს გამოთქვამ ხეირიანად.
- ნუთუ ,მხოლოდ საათის ისრების საშუალებით შეძლიათ ადამიანებს დარწმუნდნენ , რომ მართლა არსებობენ?!
- იმპერიის დასასრული მისი იმპერატორის სიკვდილით იწყება.
- სანამ ჩაძირვას არ დაიწყებ, თოკს არავინ გადმოგიგდებს.
- ნერვების აყოლა ნიშნავს იმას, რომ შენს სისუსტეებსა და ცდუნებებს დაემორჩილო.
- სხეულის უჯრედები მთლიანად , ასი პროცენტით ყოველთვიურად ახლდება.ჩვენ ერთიანად ვიცვლებით, ახლაც კი!!!ყველაფერი რაც ჩემს შესახებ იცი, საკუთარი მოგონებებია , მეტი არაფერი...
No comments:
Post a Comment