"ურჩხული გიხმობს" ფენტეზის ჟანრის რომანია, რომელიც ხის ურჩხულისა და კოშმარებით დატანჯული ბიჭის ამბავს მოგვითხრობს. როგორც კი ღამის პირველის შვიდი წუთი სრულდება, ურთხელის ხე ურჩხულად იქცევა ხოლმე და ცამეტი წლის კონორის წყვდიადით და ქარით სავსე სიზმარში ინაცვლებს. საუკუნოვანი ურთხელის ხე ბუნების მისტიკურ ძალას განასახიერებს, რომელიც კონორის ქვეცნობიერში დამარხულ შიშებს აღვიძებს და მას შემზარავი სიმართლის აღიარებას აიძულებს.
ურჩხული კონორს სამ ამბავს უყვება და სანაცვლოდ ერთი ამბის მოყოლას სთხოვს. ურჩხულის ამბები განსაკუთრებულია, რისი მიზეზიც ისაა, რომ თითოეულ მათგანშიის, ვინც ანტაგონისტი გვგონია, სინამდვილეში პროტაგონისტია. ურჩხული კონორს იმ რეალობას უჩვენებს, რომელიც ჭეშმარიტია და არა ადამიანური ილუზიებით შებურული. მათში პიროვნების ქმედება ყველა კუთხიდან განიხილება და მხოლოდ "კეთილი-ბოროტის"ცნებებით არ ფასდება.
კონორის კოშმარები მას შემდეგ იწყება , რაც მოულოდნელად დედის სასიკვდილო დიაგნოზის შესახებ შეიტყობს. დედის დაკარგვის შიშს, შორს მყოფი მამის უყურადღებობა და აუტანელ ბებიასთან ერთად ცხოვრების პერსპექტივა კიდევ უფრო ამძაფრებს. პრობლემები არც სკოლაში აკლია. მას შემდეგ , რაც მოსწავლეები დედამისის ავადმყოფობის შესახებ იგებენ , კონორი თითქოს უჩინარი ხდება ,მასთან ურთიერთობა აღარავის არ სურს.
გარშემომყოფების წყალობით , კონორ ო'მელი უჩინარი ადამიანი ხდება და აქ ლოგიკურად იბადება კითხვა : ურჩხულმა იხმო ბიჭი თუ ბიჭმა გამოიხმო ურჩხული, რათა საკუთარ შიშებში და მარტოობაში ჩაძირულს , შემზარავ სინამდვილესთან გამკლავება შეძლებოდა?! კონორს ურჩხულის არ ეშინია, მეტიც - დასცინის კიდეც მას. ალბათ იმიტომ, რომ იცის - იმაზე უარესი, რაც რეალურ ცხოვრებაში მის თავს ხდება, ვეღარ დაემართება.
გარკვეული თვალსაზრისით, პატრიკ ნესის ეს რომანი , ერთი მარტოსული მოზარდის პიროვნულ დრამადაც შეიძლება ჩავთვალოთ. ისტორიად, რომელიც გვასწავლის, რომ ზოგჯერ, როცა უძლურნი ვართ, სიტუაცია შევცვალოთ, შეგვიძლია შევცვალოთ სიტუაციისადმი ჩვენი დამოკიდებულება და ამგვარად მოვახერხოთ გადარჩენა. პირველ რიგში კი, საკუთარ თავთან სიმართლე ვაღიაროთ.თუნდაც გვრხცვენოდეს ან გვეშინოდეს. ურჩხულის მოყოლილ ამბებშიც ხომ ყველა გმირს თავისი სიმართლე აქვს და ხშირად ანტაგონისტის სიმართლე ჭეშმარიტებასთან უფრო ახლოს დგას , ვიდრე დანარჩენი პერსონაჟების.
წაიკითხეთ და მოუსმინეთ კონორ ო'მელის...
No comments:
Post a Comment