დედამიწაზე არსებობს ქვეყნები, რომლის მიწაც მძიმეა, ზოგი კი შედარებით უფრო მსუბუქი იმ ადამიანებისთვის, რომლებიც საკუთარ , დამძიმებულ მიწას გამოექცა ან იძულებული იყო გამოქცეოდა, მიეტოვებინა ყველაფერი და დარჩენილიყო მოგონებების იმედად.
მიუხედავად იმისა, რომ რომანი მარტივ ენაზეა დაწერილი, შინაარსი - მძიმე და ემოციებითაა სავსე. ორი პატარა ბიჭის ისტორია: შეცდომები, გაუბედაობა, სინანული და ტანჯვა. სიკეთე, რომელსაც ერთი პატარა ბიჭი იტევს, თან დაჰყვება მთელს რომანს. წიგნის წაკითხვის დროს გრძნობ, თუ როგორ ირევა ემოციები : სიყვარული , ბრაზი, დახმარების სურვილი. ეს არის წიგნი, რომელიც დაგასევდიანებთ. ავტორი სერიოზულ თემებს განიხილავს, რომლის მსგავსი შეიძლება ბევრჯერ გვაქვს წაკითხული და გვინახავს, მაგრამ ვერ გაგვიზიარებია თუ რა მდგომარეობა შეიძლება იყოს უცხო მიწაზე სადაც უსამართლობა და ძალადობაა, სადაც პატარა ბავშვებზე ძალადობენ, სადაც არ იცი გათენდება თუ არაშემდეგი დღე. ადგილი, სადაც ბავშვებს მშობლებს უხოცავენ, მშობლებს კი - ბავშვებს.
მთავარი ორი პერსონაჟის - ამირის და ჰასანის ისტორია არის საშინელი, შემაძრწუნებელი, ძლიერი და ამასთანავე მშვენიერი. ორი საუკეთესო მეგობარი, რომლებიც ერთად იზრდებიან, ცხოვრობენ ქაბულში და თითქმის ყველაფერს ერთად აკეთებენ. საერთო ინტერესები და ლურჯი ფრანი, რომელიც ყველაფერს ცვლის მათთვის ერთი ბედნიერების მომტან და საბედისწერო დღეს. ეს არის გამარჯვება დიდი საფასურის სანაცვლოდ.
ამირს, რომელსაც ჰქონდა შანსი ემოქმედა და დახმარებოდა მის მეგობარს უმოქმედობა არჩია, გამბედაობა არ ეყო და მთელი მისი შეგნებული ცხოვრება ამ საიდუმლოთი ცხოვრობდა. 1970 წელს, ავღანეთში პოლიტიკური კლიმატის შეცვლის შემდეგ მას და მამამისს ქვეყნის დატოვება მოუწიათ. ამირისთვის ეს იყო შანსი დაევიწყებინა წარსული და დაეწყო ახალი ცხოვრება ამერიკაში, მაგრამ ვერც ამერიკაში გაექცა წარსულს.
რომანი საინტერესოდ იცვლება მესამე ნაწილში, სადაც ამირი ახალი აღმოჩენების წინაშე დგება. ვხედავთ ამირის ბრაზს და აღშფოთებას, როცა აღმოაჩენს, რომ მამამისი მთელი მისი ცხოვრების მანძილზე იტყუებოდა ჰასანზე, თავის ნახევარ ძმაზე. ყველაზე დიდი აღშფოთება კი იმან გამოიწვია , რომ მამამისი თავისი სიტყვების საპირისპიროდ მოიქცა. ამირს სირცხვილის და დანაშაულის შეგრძნება , რომელიც ბავშვობიდან მომდინარეობს, აღარ აძლევს უკან დახევის უფლებას.
რთულად მოიძებნება მკითხველი , რომელიც გულგრილია ამ რომანის მიმართ. ამერიკელი კრიტიკოსები მიიჩნევენ , რომ წიგნის მიმართ ასეთი ინტერესი და ერთ-ერთი მიზეზი თუ რატომ გახდა ის ასეთი პოპულარული ამერიკულ საზოგადოებაში ავღანეთის მიმართ უდიდესი ინტერესით იყო გამოწვეული.
No comments:
Post a Comment