ძალიან მარტივი ენით დაწერილი დეტექტივის ჟანრის ნაწარმოები , რომელიც ერთი ამოსუნთქვით იკითხება, თუმცა უნდა აღინიშნოს , რომ ამ სიმარტივეში უფრო მეტი სიღრმე და სირთულეა, ვიდრე წარმოგიდგენიათ. ხშირად ჩერდები, ფიქრობ, მერე ისევ აგრძელებ კითხვას და ბოლოს იმდენად გითრევს, რომ ვეღარ ითმენ , სანამ ფინალში არ გახვალ.
დეტექტივი ვახსენე, თუმცა ეს წიგნი მოიცავს ყველაფერს: რამდენად შეუცნობელია ადამიანის სამყარო, რამდენად ძლიერია ადამიანის წარმოსახვა და შინაგანი ბუნება და როგორ შეუძლიათ ადამიანებს იცხოვრონ ორმაგი ცხოვრებით.
ამ არაჩვეულებრივ ამბავს გვიყვება ქართველი გოგო სოფოკო, რომელსაც აქვს ოჯახი, ჰყავს მეგობრები და ყველა გარკვეულწილად მნიშვნელოვან როლს თამაშობს მის ცხოვრებაში და არის კიდევ - მატაბელი - ჩემთვის საუკეთესო პერსონაჟი ამ თავგადასავალში. კითხულობ წიგნს და გრძნობ, რომ მატაბელის მსგავსი ადამიანები არ არსებობენ და თუ არსებობენ, გინდა რომ შეხვდე, გაიცნო და განიცადო ზუსტად იგივე მის მიმართ, რასაც მთავარი გმირი განიცდის მასთან ყოფნისას და ურთიერთობისას.
მატაბელი არის ადამიანი - მანიპულატორი. ის თამაშობს სხვების გრძნობებსა თუ ემოციებზე, შეუძლია ერთი ხელის მოსმით გაანადგუროს ყველა ვისთან ურთიერთობაც არ ხიბლავს, მაგრამ ეს არ გაძლევთ იმის უფლებას და საშუალებას , რომ იგი შეიძულოთ. ცხოვრებაც ხომ ასეა, იცი ადამიანის შინაგანი "უწმინდური" ბუნება, იგი განსხვავებულია, შესაძლოა "ცუდი ბიჭების სიაშიც" ჩაწეროთ, მაგრამ მაინც ეს "ცუდი" უფრო გხილავთ და სურვილი გიჩნდებათ დაუახლოვდეთ და ჩასწვდეთ მის ნამდვილ, შინაგან ბუნებას.
"ის ჭაობივითაა, ოღონდ ლამაზი ჭაობივით, რომელიც გიზიდავს,გინდა შეეხო, გრძნობ, ერთად ვერ იქნებით, რადგან ის წყალია, შენ კი მიწა, იწევ მისკენ, გრძნობ,რომ უკვე ჰაერი აღარ გყოფნის და უკან იხევ. იმდენად გინდა მასთან დაახლოება, მზად ხარ ამორალური ქცევისთვის, სიკვდილისთვისაც...."
ბევრს მოგითხრობდით მთავარ გმირზეც - სოფოკოზე, მაგრამ ის ისედაც თავად გიამბობთ ყველაფერს, ამიტომ მისი პიროვნების აღწერისგან თავს შევიკავებ. ის იმდენად ამოუცნობი, იდუმალი და შთამბეჭდავია, რომ აქ სიტყვები ვერაფერს გახდებიან. თქვენ თავად უნდა გაიცნოთ.
წიგნის კიდევ ერთი ხიბლი ის არის , რომ ეს ამბავი ხდება ქართველი პერსონაჟების თავს და ბევრი სიუჟეტი იმდენად შენეულია, კითხვისას შესაძლოა ბავშვობის წლებიც ამოგიტივტივდეთ. უბრალოდ წაიკითხეთ "გროსმაისტერი" მათთვის კი ვინც ჯერ არ იცის - "გროსმაისტერი" - წოდებაა, რომელიც ენიჭებათ უმაღლესი კვალიფიკაციის მოჭადრაკეებს.
No comments:
Post a Comment