"ამერიკა" ფრანც კაფკას პირველი რომანია. მას შეიძლება ვუწოდოთ ყველაზე არაკაფკასეული ნაწარმოები. მიუხედავად ამისა, რომანში გვხვდება კადრები და მონაკვეთები, რომლებიც კაფკასეულ სიზმრისეულ სამყაროს ეკუთვნის. თუმცა, რომანში მისტიკური არაფერი ხდება. სიუჟეტი არის სწორხაზოვანი და მთავარი გმირის - კარლ როსმანის გარშემო ვითარდება. მკითხველი ფეხდაფეხ მიჰყვება ძალიან ახალგაზრდა კაცს ამერიკის უცნობ მიწაზე და მასთან ერთად იზიარებს "ამერიკული ოცნების" შთაბეჭდილებებს. კარლისთვის "ამერიკული ოცნება" დელუზიად იქცევა.
კაფკა გვიხატავს ამ უცხო და ახალ მიწას თავისი გამორჩეულობით. იგი სავსეა შესაძლებლობებით, სიმდიდრით - თითქოს ერთი დიდი ძრავაა, რომელიც საოცარი ტემპითა და სიმძლავრით მუშაობს. ამავდროულად კი , იგი სავსეა სიღარიბითა და უსამართლობით.
ნაწარმოები ძალიან სხარტი და მოქნილი ენითაა დაწერილი. გაჯერებულია კომიკური სიტუაციებით და მისი კითხვისას ნამდვილად არ მოიწყენთ. ამავდროულად სხვადასხვა მონაკვეთები, მიუხედავად იმისა , რომ მათში არაფერია მისტიკური - უცნაურ სიზმარს ემსგავსებიან მკითხველის გონებაში.
უკანასკნელი თავი , რომელიც კაფკამ დაწერა სრულდება კარლის გამგზავრებით, კიდევ ერთი , ახალი და ძალიან უცნაური სამსახურის მისაღებად. კარლი ჩამოვიდა ამერიკაში და ჩაიკარგა ამ დიდი მანქანის ორომტრიალში. ალბათ , ამიტომაც აქვს ამ რომანს სხვა სახელწოდება : "კაცი, რომელიც გაქრა".
No comments:
Post a Comment