წიგნში მოთხრობილია 46 წლის ჯულია ლემბერტის ისტორია, ულამაზესი და პროფესიულად შემდგარი, შესანიშნავი მსახიობი ქალის. ის ცხოვრებისეულ კრიზისს განიცდის, რაც მას უბიძგებს რომანი გააჩაღოს ტომას ფენელთან, მასზე 25 წლით უმცროს მამაკაცთან. ჯულიასთვის არასაკმარისი აღმოჩნდება მისი "იდეალური" ოჯახი და იგი ბედნიერებისა და სიამოვნების ძებნას სწორედ იმ ახალგაზრდა მამაკაცში ცდილობს, რომელიც სინამდვილეში მას მხოლოდ თეატრში წინსვლისა და თავის დამკვიდრებისთვის იყენებს.
მას შემდეგ, რაც ჯულიასთვის ყოველივე ნათელი გახდება, იგი შეასრულებს თავისი ცხოვრების ყველაზე მთავარ და გარდამტეხ როლს და სწორედ ამ იდეალურად შესრულებული სასცენო სახით, იგი იმარჯვებს, როგორც ამ დიდ ტყუილზე, ასევე საკუთარი თავის სისუსტეებსა და დამაბრმავებელ ვნებაზე.
წიგნის კითხვის პროცესში მკითხველი დარწმუნდება თუ რამდენად კარგად იცნობს ავტორი ქალის ბუნებას, როგორ ზედმიწევნით და ზუსტად გადმოსცემს ქალის ფიქრებს, ვნებებს, თვითდაჯერებულობას და სიყვარულს. ასევე ნახავს თუ რა მდგომარეობამდე შეიძლება მიიყვანოს ქალი ეჭვიანობამ და რა შეიძლება მოიმოქმედოს მან. ეჭვიანობა ღრღნის და აუძლურებს ადამიანს. ზოგჯერ კი აძლიერებს და შურისძიების გრძნობას უღვივებს. ეჭვიანი ქალისთვის კი შურისძიება უპირველესი ხდება და მიმართავს არაძალადობრივი ქმედებებით სხვის დაუძლურებას.
რომანის დასასრულიც გენიალური სიტყვებით გვირგვინდება :
"თამაში - თვალთმაქცობაა და ეს თვალთმაქცობა გახლავთ ერთადერთი და ნამდვილი რეალობა ამ ცხოვრებაში."
No comments:
Post a Comment